DORËZOHET NË KUVEND LIGJI PËR RININË

CRCA, ANYN dhe mbi 40 organizata Rinore, pas një pune 2-vjeçare dhe konsultimeve me mbi 1000 të rinj e të reja në Shqipëri, i kërkojnë Kuvendit të miratojë sa më shpejt këtë ligj dinjitoz për të drejtat e të rinjve në vend

Tiranë, 16 Janar 2019 - Një grup deputetësh të Parlamentit të Shqipërisë, të dedikuar prej vitesh për të drejtat e të rinjve, dorëzuan më 11 Janar, në Kuvendin e Shqipërisë, kërkesën e tyre për shqyrtimin dhe miratimin e projekt-Ligjit për Rininë në Shqipëri. Kjo nismë ligjore vjen si një përpjekje e gjerë e shoqërisë civile dhe e të rinjve shqiptarë për të ndryshuar dhe përmirësuar situatën e rëndë të të drejtave të tyre.

Nën moton “Për të rinjtë – me të rinjtë – nga të rinjtë”, projekt-ligji i përgatitur nga ekspertët më të mirë të fushës të CRCA Shqipëri, një nga organizatat kryesore në vend për të drejtat e fëmijëve dhe të rinjve, në bashkëpunim me Rrjetin Kombëtar për të Rinjtë në Shqipëri (ANYN) dhe Laboratori i Politikave për Fëmijët dhe të Rinjtë në Shqipëri, kërkon të krijojë një arkitekturë të re kombëtare dhe lokale për të drejtat, pjesëmarrjen dhe fuqizimin e rreth 700.000 të rinjve e të rejave në Shqipëri, të cilët përbëjnë edhe 25 përqind të popullsisë në vend.

Projek-ligji u dorëzua në Kuvend zyrtarisht nga deputetja Nora Malaj, një aktiviste tepër e njohur për të drejtat e grave, fëmijëve dhe të rinjve dhe Ambasadore e CRCA Shqipëri në Samitin e 1-rë të Vajzave në Shqipëri.

Ligji për Rininë sjell një sërë risish për kuadrin institucional dhe atë të politikave shtetërore për të rinjtë në Shqipëri, si krijimin e Avokatit për të Drejtat e të Rinjve, krijimin e zyrës së Koordinatorit Kombëtar për Rininë, kuota rinore të përfaqësimit politik dhe vendim-marrës të tyre më të larta, një buxhet të dedikuar dhe më të lartë për ta, si dhe krijon një mekanizëm kombëtar dhe vendor për të rinjtë në Shqipëri.

CRCA dhe ANYN, që prej vitit 2015 punuan me të rinjtë në 12 qarqe të vendit për të mbledhur dhe adresuar të gjitha problematikat dhe prioritetet që duhet të përmbante ligji. Ky proces u zhvillua për të garantuar një përfshirje sa më të gjerë të rinisë në hartimin e projekt-ligjit, por edhe për të krijuar një oponencë sa më konstruktive të draftit qeveritar të tij

Shqipëria është një ndër vendet e fundit në rajon që ende nuk e ka një ligj për rininë. Ligji për Rininë do të përcaktojë kushtet kryesore në fushën e rinisë, siç është politika rinore dhe sektori i të rinjve, aktiviteti i të rinjve, puna rinore, edukimi joformal i të rinjve, si dhe një përkufizim i rinisë apo të rinjve.

CRCA Shqipëri dhe Rrjeti Kombëtar për të Rinjtë në Shqipëri ftojnë të gjithë deputetët e Kuvendit të Shqipërisë të miratojnë sa më shpejt e mundur këtë nismë kaq të nevojshme, të domosdoshme dhe të shumëkërkuar nga të rinjtë.

Sponsors

Follow us on facebook

Contact us